Om ressurssenteret

Målet vårt

I digitaliseringsstrategien Én digital offentlig sektor (2019–2025) vart det slått fast at regjeringa ville etablere eit nasjonalt ressurssenter for deling av data, med spisskompetanse på samanhengen mellom juss, teknologi, forretnings- og forvaltningsprosessar.

Det overordna målet for ressurssenteret er å bidra til ein effektiv og brukarorientert offentleg sektor som nyttar potensialet som finst i data og datadeling til å skape brukarvennlege tenester. Senteret skal leggje til rette for innovasjon, utvikling av nye tenester og verdiskaping ved at det oftare vert delt data mellom offentlege verksemder og mellom det offentlege og næringsliv, forskarar og frivillig sektor.

Ressurssenteret skal gjennom tolkingar av relevant regelverk synleggjere handlingsrommet for deling av data. Senteret skal òg jobbe for å avdekka hindringar og fremje regelverksutvikling som støttar opp under politiske mål om digitalisering.

I digitaliseringsstrategien Fremtidens digitale Norge 2024–2030 blir Nasjonalt ressurssenter for deling og bruk av data trekt fram som ein sentral aktør i utviklinga av digitaliseringsvennleg regelverk. Ressurssenteret skal støtte heile offentleg sektor i dette arbeidet, og strategien peikar på behovet for å styrkja kapasiteten for å møta auka etterspurnad og sikra at regelverka er tilpassa digital gjennomføring.