Hopp til hovudinnhald

Statsbygg såg behov for å utvikle ei ny teneste, metodar og verktøy for å forbetre måten dei varetek langsiktige arealbehov hos leigetakarane sine og følgje opp dei nye og strengare statlege føringane for arealbruk.

Verksemd: Statsbygg

Leverandør: Knowit og Designit

Om prosjektet

Hovudoppgåva til Statsbygg er å tilby kostnadseffektive og funksjonelle lokale til statlege verksemder. Prosjektet inkluderer to pilotar, Statens hus i Steinkjer og eitt bygg i Oslo-regionen.

Stadig strengare kostnads- og klimakrav, stiller større krav til at Statsbygg tilbyr kostnadseffektive og funksjonelle lokale som er gode å bruke. Prosjektet handla om å balansere berekraftig utnytting av samfunnet sine ressursar med enkeltmennesket sine behov for gode arbeidsforhold. Statsbygg påpeiker sjølv korleis den tradisjonelle kompetansen dei har brukt, kjem til kort for å avdekkje erkjente og ikkje-erkjente behov. StimuLab meiner at det ligg eit innovasjons- og gevinstpotensial i at Statsbygg utviklar nye metodar for meir effektivt å hente inn nødvendig kunnskap om ulike brukarar sine behov.

Statsbygg fortel om korleis dei jobba i Stimulab-prosjektet

Tiltak

Prosessen vart planlagd og gjennomført som ein tenestedesignprosess med 5 fasar. Gevinstrealiseringsaktivitetar og forankringsmøte er gjennomførte parallelt med tenestedesignaktivitetane. Resultat og status vart presenterte jamleg for referansegruppa undervegs.

Fase 1: Leggje grunnlaget

Fase 2: Forstå landskapet

Fase 3: Tenkje nytt

Fase 4: Test, lær, involver

Fase 5: Forankring og dokumentasjon

Prosjektet har utvikla 10 verktøy og metodar til hjelp for å avdekkje behov når bygg skal endrast eller byggjast:

  • eigenteikna plan
  • brukarreise
  • strategisk samtale
  • nøkkelfunn
  • modellering og pilotering
  • assosiasjonsord
  • visjonsøving
  • behovsomsetjar
  • behovsgrupper
  • myteknusar

Forventa gevinstar

Ved implementering av verktøy og prosess for behovskartlegging forventar ein på bakgrunn av nøkkelfunna at Statsbygg og leigetakarane kan oppnå følgjande gevinstar:

  • mindre tid på ikkje-verdiskapande kundedialog
  • betre brukaroppleving hos leigetakar i rådgjevingsprosjekt
  • mindre feil og manglar ved synfaring på grunn av identifisering av behov tidleg
  • færre kompenserande tiltak med betre forståing av behov og riktig krav i kravspesifikasjonen til byggherre
  • færre iterasjonar/kortare tid i avklaringsfasen i små/middels byggjeprosjekt
  • mindre tid brukt på support
  • generelt høgare kundetilfredsheit
  • lågare kostnad per kvm
  • kompetanseheving