Satsingsforslag for store IT-prosjekt
Store IT-prosjekt som krev stor ressursinnsats over tid, kan finansierast gjennom eigne satsingsforslag.
Verksemda sender eit satsingsforslag for behandling som særskilt løyving til eige departement. Dette vert gjerne gjort etter samtalar med departementet.
Eit satsingsforslag er ein omfattande og tidkrevjande prosess, og er mest aktuelt for prosjekt som krev stor ressursinnsats over tid. Små og mellomstore prosjekt bør sjå på andre finansieringsmåtar.
DFDs vurdering av IT-relaterte satsingsforslag
Som ansvarleg for samordninga av IT-politikken til regjeringa, skal Digitaliserings- og forvaltningsdepartementet (DFD) vurdera satsingsforslaget frå departementa om utvikling av IT-løysingar, og deretter senda ei fråsegn til Finansdepartementet for bruk i det vidare budsjettarbeidet.
Når fagdepartementet sender inn IT-relaterte budsjettforslag i budsjettprosessen i regjeringa, skal det også senda ein kopi til DFD. DFD vurderer og prioriterer mottekne satsingsforslag, og gir ein administrativ uttale til FIN før den første budsjettkonferansen i mars. Fagdepartementa får kopi av DFDs uttale til FIN.
Nye terskelverdiar for KS-ordninga frå 2019
Prosjekt som er med i kvalitetssikringsordninga (KS-ordninga), det vil seie prosjekt med ei kostnadsramme på meir enn 300 MNOK, er ikkje beskrivne her.
KS-ordninga blei revidert hausten 2019. Ei viktig endring er nye terskelverdiar for digitaliseringsprosjekt. Terskelverdien for digitaliseringsprosjekt er nå 300 millioner kroner. Eit digitaliseringsprosjekt er eit utviklingsprosjekt eller endringsprosjekt der IT utgjer ein sentral del. Dei nye terskelverdiane inneber at fleire digitaliseringsprosjekt vil bli omfatta av krava. Endringen blir utført for å styrke oppfølginga på eit område som er viktig for utvikling av offentleg sektor.
Lang prosess frå forslag til løyving
Ei tidslinje for finansiering gjennom satsingsforslag kan gjerne sjå slik ut:
- År 1
Forslaget vert utarbeidd og sendt til eige departement normalt innan utgangen av oktober, fristen vert fastsett av eige departement. (Høyr med departementet kva fristar som gjeld) - År 2
Forslaget vert behandla i budsjettrundane i regjeringa. Endeleg avgjerd vert gjort i den siste budsjettkonferansen til regjeringa før statsbudsjettet vert lagt fram for Stortinget i oktober. - År 3
Så framt Stortinget vedtar det foreslåtte satsingsforslaget i budsjettbehandlinga, kan forslaget settast ut i livet.