Digitale barrierar på norske nettstader 2018
Tilsyn for universell utforming av ikt i Difi har målt status for universell utforming av 278 nettstader i privat og offentleg sektor. Målinga viser at mange nettaviser og nettbutikkar er lite tilgjengelege og at det er vanskeleg å bestille reiser og overnatting på nett.
Konsekvensen av å bli utestengt frå dei digitale arenaene i samfunnet er stor for den enkelte. Universell utforming skal bidra til at flest mogleg kan delta på digitale arenaer.
Formålet med målinga er å avdekke digitale barrierar. Målinga famar om nettstader som har store brukarvolum på samfunnsområde som er viktige for likeverdig samfunnsdeltaking. Tilsynet brukar resultata frå målinga til å peike ut verksemder og nettstader som er aktuelle for kontroll (tilsyn).
Risikoområde
Statusmålinga har vist at
- det ikkje er likeverdig sjølvbetjening på nett
- fleire innhaldstypar er lite tilgjengelege
- det er utfordrande å navigere på mange nettstader
- digitale skjema er vanskelege å bruke
- ikkje-tekstleg innhald som video og bilde, er lite tilgjengeleg
Funna i målinga kan indikere at
- offentlege nettstader er meir tilgjengelege enn nettstader i privat sektor
- mange medienettstader og nettbutikkar er lite tilgjengelege
- det er vanskeleg å bestille reiser og overnatting
Du kan laste ned rapporten i PDF, eller sjå tilsynet sine nettsider for oppsummering av statusmålinga 2018 og resultat per verksemd (uutilsynet.no).
På uutilsynet.no finn du også informasjon og rettleiing om korleis du kan følge krava.